Түркістан облысы, Сарыағаш қаласында «Жайлы мектеп» Ұлттық жобасы шеңберінде салынып жатқан 300 орындық мектептің құрылысы – «AMANAT» партиясының Сайлауалды бағдарламасында қамтылған. Білім нысанының дайындық деңгейін Түркістан облысына жасаған жұмыс сапары аясында «AMANAT» партиясы Орталық аппараты Партиялық бақылау департаментінің директоры Дәурен Бижұманов қадағалады.
Қабылданған жоспар бойынша бұл мектептің құрылысы биылғы желтоқан айында толық аяқталуы керек. Әлеуметтік маңызы бар нысан құрылысында кездесіп жатқан өзекті мәселелер туралы «AMANAT» партиясы Сарыағаш аудандық филиалының төрағасы, аудандық мәслихат депутаты, фракция жетекшісі Шермат Ибрагимов, Түркістан облыстық мәслихатының депутаты, фракция мүшесі Уәлихан Рахиев мағлұмат берді. Тапсырыс беруші «Samruk-Kazyna Construction» АҚ-ы тарапынан тиісті қаржы көлемінің бөлінуінде мәселе бар екенін мердігер ұйым «А-Спецстрой» ЖШС-нің өкілдері айтты.
«-Қазір мектеп құрылысын өз қаржымыздың есебінен жүргізіп отырмыз, құрылысқа тартылған жұмысшылардың саны 42 адамды құрайды. Тапсырыс беруші тарапынан тиісті қаржы көлемі төленетін болса, жұмысшылар санын арттыруға, нысанды жыл соңына дейін жеткізбей, тапсыруға бар мүмкіндіктерді қарастырамыз», — деді мердігер ұйымның жауапты өкілі.
Атап өтуіміз керек, мектеп құрылысы 2023 жылы басталған, ғимараттың дайындығы бүгінде 80 пайызға жеткен. Заманауи пәндік кабинеттерін, оның ішінде робототехника, модификацияланған сынып кабинеттерін қажетті оқу құралдарымен жабдықтау, ішкі әрлеу жұмыстарын аяқтау, кең жолақты интернет байланысымен қамту, мектеп ауласын абаттандыру жұмыстары қалған. Партияның Орталық аппараты Партиялық бақылау департаментінің директоры мектеп құрылысын аяқтау үшін қаржы бөлу мәселесі бойынша «Samruk-Kazyna Construction» АҚ-мен байланысып, мәселенің дұрыс шешім табу жолы қарастырылатынын айтты.
