«AMANAT» партиясының Сайлауалды бағдарламасы шеңберінде салынып жатқан жаңа мектептердің құрылысы ерекше бақылауымызға алынған. Білім беру ұйымдарының жаңа оқу жылына дайындығы күні кеше Түркістан облысының әкімі Нұралхан Көшеровтың қатысуымен өткен арнайы жиында қаралды. Мәжілісте оқу жылы қарсаңында пайдалануға берілуі тиіс жаңа мектептердің мәселесі жан-жақты пысықталып, құрылыс жұмыстарының мерзімінде аяқталуына бақылауды күшейту тапсырылды.
Түркістан облысы бойынша жаңа оқу жылы қарсаңында пайдалануға берілуі тиіс 13 мемлекеттік мектептің ішінде Шаян ауылындағы 300 орындық мектептің құрылысы да бар. «Жайлы мектеп» Ұлттық жобасы шеңберінде бой көтерген бұл нысан, «AMANAT» партиясының Сайлауалды бағдарламасына еніп, құрылыс жұмыстарының барлық кезеңі партия өкілдерінің қадағалауында болды. Құрылыс жұмыстары аяқталу сатысына келіп жеткен нысанның дайындығын кезекті мәрте зерделеуден өткізуге құрылыс алаңына партияның Бәйдібек аудандық филиалының атқарушы хатшысы Қуанышбек Қансейітов, аудандық партия филиалы партиялық бақылау комиссиясының төрағасы, аталған нысандағы партиялық бақылау бекетінің жетекшісі С.Сыпабеков, тағы да басқа партияның жауапты өкілдері арнайы барды.
Мектеп құрылысының ішкі жұмыстары 90 пайызға аяқталған, сыртқы абаттандыру жұмыстары қарқын алған. Мердігер ұйым – «Тамыз Құрылыс ББК» ЖШС-гі директорының орынбасары Бағлан Әбдірахман нысанды мерзімінде тапсыру үшін құрылысшылар бригадасын арттырғанын айтты. Қазірдің өзінде құрылыс жұмыстарын атқаруға 105 жұмысшы, 6 арнайы техника жұмылдырылғанын мәлімдеді. Партия өкілдері құрылыс қарқыны артқан нысанда бірінші кезекте қауіпсіздік талаптары сақталуы тиіс екенін ескертті. Жұмыстардың сапалы атқарылуы маңызды екенін жеткізіп, ішкі бақылауды күшейтуді тапсырды.
Партия өкілдері сондай-ақ мектептің қажетті оқу жабдықтарымен қамтылуын, пәндік кабинеттердің дайындық деңгейін, бейнебақылау және дыбыстық хабарлау жүйелерінің қалыпты жұмыс істеуін бақылаудан өткізді. Соңғы технологиялық үлгіде қызмет атқаратын жаңа мектепке интерактивті тақталар, компьютерлер, принтерлер, ноутбуктар, қуаттағыш құралдары алынып, сынып жиһаздарын сатып алуға тапсырыс берілген. Мектептің дайындық деңгейі партия өкілдерінің күнделікті бақылауында болады.
