«AMANAT» партиясы Түркістан облыстық филиалы төрағасының уақытша міндетін атқарушы, Түркістан облыстық мәслихатының депутаты Қалыйма Жантөреева Шаян ауылындағы 300 орындық мектептің құрылысын қадағалады. Партияның Сайлауалды бағдарламасы шеңберінде салынып жатқан бұл нысан «Жайлы мектеп» Ұлттық жобасы шеңберінде бой көтерді.
Құрылыс жұмыстары аяқталу сатысына келіп жеткен нысанның дайындығы партия өкілдерінің тұрақты бақылауына алынған. Мектеп құрылысының ішкі жұмыстары аяқталуға жақын, сыртқы абаттандыру жұмыстары қарқын алған. Қалыйма Жантөреқызы мектептің қажетті оқу жабдықтарымен қамтылуын, пәндік кабинеттердің дайындық деңгейін, бейнебақылау және дыбыстық хабарлау жүйелерінің қалыпты жұмыс істеуін бақылаудан өткізді. Мердігер ұйым – «Тамыз Құрылыс ББК» ЖШС-гі өкілдерінің айтуынша, мектепті жаңа оқу жылына тапсыру үшін барлық жағдайлар қарастырылғанын жеткізді. Қазірдің өзінде құрылыс жұмыстарын атқаруға 105 жұмысшы, 6 арнайы техника жұмылдырылғанын айтты.
Нысанның дайындығы және қажетті жабдықтармен қамтылу жағдайын партияның Бәйдібек аудандық филиалының атқарушы хатшысы Қуанышбек Қансейітов атап өтіп, партиялық бекеттің жұмысы туралы мағлұмат берді. Мектептің дайындық деңгейі партия өкілдерінің күнделікті бақылауына алынған.
Сондай-ақ осы жұмыс сапары аясында Қалыйма Жантөреқызы Шаян мектеп-лицейінің ғимаратында жүріп жатқан ағымдағы жөндеу жұмыстарының барысымен танысып, оқу орнының жаңа оқу жылына дайындығын көрді.
Атап өтуіміз керек, өңіріміз бойынша биыл бюджет есебінен 13 жаңа мектеп пайдалануға беріледі. Мектептерді жаңғырту жобасы аясында 2025 жылы ағымдағы жөндеумен 15 мектеп, күрделі жөндеумен 26 мектеп қамтылды. Құрылысы және жөндеу жұмыстары жүріп жатқан мектептердің уақтылы әрі сапалы тапсырылуы облыс әкімінің тікелей қадағалауына алынған. Осы нысандардың жаңа оқу жылына дайындығы мәселесі партиямыздың жіті бақылауына алынып, зерделеу жұмыстары тұрақты түрде жүргізіліп келеді.
