Түркістан облысының әкімі Нұралхан Көшеровтің төрағалығымен өткен жұмыс мәжілісінде өңірдегі кеден бекеттерінің тиімділігін арттыруға бағытталған нақты шаралар мен өзекті мәселелер талқыланды. Жиынға салалық жауапты басшылар қатысты.
Мәжілісте Түркістан облысы мен Өзбекстан Республикасы арасындағы шекарадағы кеден бекеттерінің жай-күйі, инфрақұрылымдық жағдайы, өткізу қабілетін арттыру, санитарлық тазалық пен қолайлы қызмет көрсету бағытындағы мәселелер кеңінен қаралды. Сонымен қатар кеден аумақтарын кеңейту және олардың жұмыс тиімділігін арттыру бойынша нақты ұсыныстар мен жоспарлар айтылды.
Облыс әкімі Нұралхан Көшеров өз сөзінде кеден бекеттерінің елдің халықаралық беделі мен экономикалық қауіпсіздігін қамтамасыз етудегі маңызын ерекше атап өтті.
Бүгінгі таңда Түркістан облысы мен көршілес Өзбекстан Республикасы арасындағы шекарада «Қазығұрт», «Жібек жолы», «Қапланбек», «Б.Қонысбаев», «Атамекен», «Сырдария» және «Нұрлы жол» кеден бекеттері жұмыс істейді. Бұл нысандардың маңыздылығын ескере отырып, облыс әкімдігі олардың тиімді жұмыс істеуі үшін тиісті инфрақұрылымдық жағдай жасауға, жол қатынасын жақсартуға және қауіпсіздікті қамтамасыз етуге ерекше көңіл бөлуде. «Қазығұрт», «Б.Қонысбаев», «Атамекен», «Сырдария», «Нұрлы жол» кеден бекеттеріне апаратын жолдар ҚР Көлік министрлігінің Автомобиль жолдары комитетінің теңгерімінде болса, «Қапланбек» және «Жібек жолы» бекеттеріне баратын жолдар облыс әкімдігіне қарайды.
Облыс әкімі жергілікті атқарушы органдар мен мемлекеттік құрылымдар арасындағы тиімді әріптестік пен өзара іс-қимылдың маңыздылығын атап өтті. Барлық мүдделі тараптардың күш-жігерін біріктіру арқылы ғана шекаралық аймақтарда орналасқан кеден бекеттерінің жұмысын жақсартуға қол жеткізуге болатынына сенім білдірді.
Жиын қорытындысы бойынша облыс әкімі жауапты сала жетекшілеріне кеден бекеттеріндегі инфрақұрылымдық мәселелерді шешу, қызмет көрсету сапасын арттыру және шекарадан өтетін азаматтар үшін қолайлы жағдай жасау бойынша нақты тапсырмалар берді.
