2024 жылдың қыркүйегіндегі мәліметтерге сәйкес, Қазақстандағы орташа жалақы 817,2 долларды құрап, Орталық Азия елдері арасындағы ең жоғары көрсеткішке жетті. Бұл туралы Ranking.kz хабарлады. Орташа жалақы деңгейі бойынша Қазақстан Өзбекстан (437,8 доллар) мен Қырғызстаннан (411,2 доллар) екі есе жоғары. Ал Тәжікстандағы көрсеткіш (242,8 доллар) әлдеқайда төмен. Түркіменстанға қатысты нақты деректер жоқ.
Қазақстан ең төменгі жалақы бойынша да көш бастап келеді: бұл көрсеткіш 85 000 теңгені немесе 181,1 долларды құрайды. Басқа елдермен салыстырғанда:
- Өзбекстанда ең төменгі жалақы – 89,4 доллар;
- Тәжікстанда – 54,9 доллар;
- Қырғызстанда – 28,3 доллар.
Түркіменстанда ең төменгі жалақы 1 410 манатты құрайды, бұл мемлекеттік бағам бойынша 402,9 долларға тең. Алайда бейресми дереккөздер доллардың айырбас бағамы бұл сомадан айтарлықтай өзгеше екенін алға тартады, сондықтан нақты көрсеткіш шамамен 74,2 доллар болуы мүмкін.
Инфляция деңгейі: қай елдерде жоғары? Орталық Азиядағы инфляция деңгейі бойынша ең жоғары көрсеткіш Өзбекстанда тіркелген – 7,7%. Қазақстан бұл тізімде екінші орында – 6,6%. Одан кейін Қырғызстан (4,2%) мен Тәжікстан (3,2%) тұр.
Қазақстан аймақтағы ең жоғары жалақы мен төменгі жалақы көрсеткіштеріне ие болып, экономикалық көшбасшылықты сақтап келеді. Алайда инфляцияның жоғары деңгейі сатып алу қабілетіне әсер етуде. Сарапшылар бұл елдердегі өмір сүру деңгейін жақсарту үшін инфляцияны бақылауға алу және еңбек нарығындағы теңгерімді сақтау маңызды екенін айтады.
