«AMANAT» партиясының Түркістан облыстық филиалы биыл төртінші жыл қатарынан азаматтардың білімі мен зердесін ұштастыратын, ұлттық құндылық пен тарихи сананы дәріптейтін «AMANAT AQYLMAN» зияткерлік ойындарын өткізіп отыр. Биылғы ойындар Қазақстан Республикасы Конституциясының 30 жылдық мерейлі белесіне арналып, іріктеу кезеңдері 17 аудан, қалада өткізілді. Іріктеу кезеңіндегі әрбір ойынға 8-10 команда қатысып, партия филиалының «Жастар рухы» жастар қанаты бастамашыл болған бұл жоба өңір жастары үшін интеллектуалды бәсекелестікпен қатар, рухани дамуға жол ашатын ерекше платформа болып қалыптасты.
«AMANAT AQYLMAN» ойындарының ақтық кезеңі бүгін Түркістан қаласындағы «Конгресс Холл» көпсалалы кешенінде ашылды. Ата Заңның 30 жылдығына арналған іс-шара Қазақстан Республикасы Гимнінің салтанатты орындалуымен басталды. Зияткерлік ойындардың рухы Түркістанның терең тарихымен, мәдени болмысымен үндестігін көрсетті, жастарды ұлт тағдырына бейжай қарамайтын, білімді де парасатты тұлға болуға баулитын алаң ретіндегі мәртебесін паш етті.
«AMANAT AQYLMAN» ойындарының ашылу салтанатында сөз алған «AMANAT» партиясы Түркістан облыстық филиалы атқарушы хатшысының орынбасары, Түркістан облыстық мәслихатының депутаты Қалыйма Жантөреева қоғамды білім мен парасаттылыққа бастайтын бастамалардың қатарында бұл ойындар ерекше маңызға ие жоба екенін айтты.
«- «AMANAT AQYLMAN» ойындары жастардың білімін ғана емес, жауапкершілігін, көшбасшылық қасиетін танытатын алаң. Бұл – рухани жаңғыру мен зияткер ұлт қалыптастыру жолындағы нақты қадам. Зерде сайысы жастардың ой-өрісін дамытып, тарихи сананы жаңғыртуға, елдік мәселелерге бей-жай қарамайтын, зерделі ұрпақ қалыптастыруға бағытталған. Биыл 30 жыл толып отырған Конституциямызда білім беру мәселесі адамның негізгі құқықтары мен бостандықтарының қатарында қарастырылады. Бұл – мемлекеттің азаматтарға білім алуға кепілдік беретінін білдіреді. Конституция білім беру саласының құқықтық негізін белгілеп, оның қолжетімділігі мен міндеттілігі туралы нақты баптармен бекіткен. Жастардың басын қосқан зияткерлік сайыс зерделі азаматтық ұстанымы бар белсенді азаматтар шоғырын қалыптастыру, олардың мәдени-рухани дүниетанымын кеңейту, белсенді әрі білімді жас буынның қатарын көбейту міндетін көздейді. Ақылдылар сайысында әрдайым жолдарыңыз ашық болсын», — деп ақ тілегін жеткізді Қалыйма Жантөреқызы.
Партияның Түркістан облыстық филиалының «Жастар рухы» жастар қанатының төрағасы Жансерік Жұман да сөз алып, білім бәйгесіне шыққан жастарға сәттілік тіледі. «- «AMANAT AQYLMAN» ойындары Түркістан облысының жастары бас қосатын, ой жарыстыратын мәртебелі алаңға айналды. Ата Заң – айбыным деп өскен жас ұрпақтың өкілдері ретінде, Контитуциямыз кепіл болған игіліктерді көріп келеміз. Бүгін жарыс жолына шыққан командалар 7 кезең бойынша мықты топты анықтайтын олады. Соның ішінде Ата Заңмен бекітілген құқықтық нормалар туралы заң талаптары, партиялық қызмет туралы сауалдар да бар. Ойынға түсіп жатқан командалардың бәріне сәттіліктер тілейміз», — деді Жансерік Бауыржанұлы.
«AMANAT AQYLMAN» интеллектуалдар сайысына барлығы 17 команда қатысты. Әр команда 5 ойыншысын ортаға шығарды. Зияткерлер жарысына түскен командалардың құрамында түрлі сала өкілдері болды. Оның ішінде білім беру, денсаулық сақтау, әлеуметтік сала, көлік және байланыс, кәсіпкерлік қызмет, мемлекеттік қызметшілер, жұмысшы мамандық иелері, жастар ұйымдарының белсенділері болды. Командалардың дайындығын, тапсырмаларды орындау шеберлігін «AMANAT» партиясы Түркістан облыстық филиалы атқарушы хатшысының орынбасары, Түркістан облыстық мәслихатының депутаты Қалыйма Жантөреева, «Конгресс Холл» көпсалалы кешенінің директоры Асқар Кенехан, «AMANAT» партиясы Түркістан облыстық филиалы «Жастар рухы» жастар қанатының төрағасы Жансерік Жұман, облыстық Жастар ресурстық орталығы директорының орынбасары Пердебек Есқұлов бағалап, қазылық етті.
Сайыс кезең-кезеңмен өтіп, қатысушылар түрлі интеллектуалды тапсырмалар арқылы логикалық ойлау, командалық жұмыс және шешендік өнер бойынша сынға түсті. Әрбір қатысушы біліммен қатар, өз дарынын, алғырлығын және елдік ұстанымын көрсете білді. Ойынға қатысқан командалар білім, тапқырлық, логика және стратегиялық ойлау қабілеттері бойынша сынға түсті. Қатысушылар тарих, әдебиет, мәдениет, саясат, заманауи жаңалықтар мен қоғамдағы өзекті тақырыптар бойынша білімдерін ортаға салып, пікір алмасты. Ойынның мазмұны тек білім бәсекесі ғана емес, замандастар арасындағы сұхбат алаңы ретінде де өрбіді. Қатысушылар бір-бірінен үйреніп, көзқарастарымен бөлісіп, ортақ ұлттық құндылықтарды талқылады.
Ой жарысының қорытындысымен: жүлделі бірінші орынды Сарыағаш ауданы еншілесе, екінші орынды – Төлеби ауданы, үшінші орынды – Отырар ауданының командасы иеленді. Барлық қатысушыларға «AMANAT» партиясы Түркістан облыстық филиалының төрағасы А. Үмбетәлиевтің Алғыс хаты табыс етілді.
