Астана тұрғыны Threads әлеуметтік желісінде Starbucks қызметіне қатысты жазбасымен бөлісіп, көпшіліктің талқылауына түрткі болды. Оның айтуынша, Talan Towers ғимаратындағы кофехананың кассирі қазақ тілін мүлдем түсінбеген.
“Кеше Talan Towers-тегі Starbucks-қа бардым. Кассада қазақ жігіті тұрды. Мен кофе тапсырысын қазақша бердім, бірақ ол түсінбеді. Мұндай ірі компания қызметкерлерінің қазақ тілін білмейтініне таңғалдым. Неге басшылық олардан мемлекеттік тілді меңгеруді талап етпейді?” — деп жазды ол.
Жазба қысқа уақыт ішінде кең тарап, әлеуметтік желі қолданушылары арасында қызу пікірталас туғызды. Көпшілік автордың пікірін қолдап, мемлекеттік тілдегі қызметтің болмауы — тұтынушы құқығын шектеу деп бағалады. Тіпті кейбіреулер Starbucks-қа ресми түрде шағым түсіруге кеңес берген.
Пікір қалдырған қолданушылардың бірі:
«Біз өз елімізде өз тілімізде қызмет ала алмай отырмыз. Бұл – ұят емес пе?» — деп жазды.
Бұл жағдай 2024 жылдың желтоқсанындағы тағы бір дау есімізге салады. Сол кезде мәзірде қазақ тілінің болмауы жұрттың наразылығын туғызып, Астанадағы Starbucks кофеханаларының рейтингі күрт төмендеген еді.
Мемлекеттік тіл — қызмет көрсету тілі
Қазақстан Республикасының «Тіл туралы» Заңына сәйкес, тұтынушылар мемлекеттік тілде ақпарат алып, қызмет көрсетуге толық құқылы. Ірі халықаралық компаниялардың бұл талапты елемеуі — қоғамның наразылығын үдете түсуде.
Starbucks тарапынан әзірге ешқандай ресми пікір айтылған жоқ. Алайда қоғам тарапынан қысым күшейе берсе, бұл жағдай компания саясатына өзгеріс енгізуге мәжбүр етуі мүмкін.
