Түркістан облысында көктемгі мезгілмен қатар оралатын жыл құстары биыл айтарлықтай азайған. Бұл туралы аймақтағы орнитолог мамандар хабарлады. Жыл сайын Сырдария өзенінің оң және сол жағалауын, Түркістан өңірінің табиғи аймақтарын мұқият бақылап отыратын сала қызметкерлері құстардың санында күрт төмендеу барын айтып отыр.
Мамандардың айтуынша, бұған соңғы кездері өңірде жауын-шашын мөлшерінің азаюы себеп болған. Ылғал жетіспеушілігі салдарынан табиғи ортада өзгерістер орын алып, құстардың мекендейтін, ұя салатын жерлерінің сапасы төмендеген. Бұл жағдай экожүйеге кері әсер етіп отыр.
Түркістандағы орман және жануарлар дүниесін қорғау инспекциясы мен табиғат қорғау ұйымдарының қызметкерлері тек құстарды ғана емес, сондай-ақ жәндіктер мен жабайы жануарлардың да өсімін, жүріс-тұрысын бақылауда ұстап келеді. Олар күнделікті тіршілігінде әдеттегі амандық сұрасудан гөрі: «Ұшқан құс, жүгірген аң аман ба?» деп сұрасады екен. Бұл – олардың кәсіби ұстанымына айналған тіркес.
– Құстар – табиғаттың тірі индикаторы. Олар экожүйедегі кез келген өзгеріске сезімтал. Биыл олардың аз келуі – климаттық жағдайдың өзгеріп жатқанын аңғартады, – дейді сала мамандары.
Қазір жауапты органдар жағдайды тұрақтандыру үшін табиғи су көздерін тиімді пайдалану, орманды алқаптарды қалпына келтіру секілді бірқатар шараларды қолға алуда. Сонымен қатар, тұрғындар да табиғатты қорғауға атсалысуы қажет екенін еске салады.
